Plantun de Prouvènço

Pèr coumpara dos planto d'encò nostre

Trifolium fragiferum & Arundo donax

Trifolium fragiferum

Fabaceae Leguminosae

Noms en français : Trèfle fraisier, Trèfle porte-fraise.

Descripcioun :
Lou tréule-fraguié rebalo au sòu ounte fai de coulounìo bonodi si fiéu (estouloun). Es uno planto emé de fru coutounous, pamens èi di proun pelous ço que lou destrìo de Trifolium tomentosum e si flour soun pas renversado au contro dóu catoun, Trifolium resupinatum. Apoundèn que li bratèio soun soudado à la baso. Coumpara emé lou catoun o emé lou tréule-à-coutoun.

Usanço :
Aquéu tréule renadiéu pòu remplaça utilamen la tepo, qu'a gaire besoun d'aigo pèr crèisse e s'espandi.

Port : Erbo
Taio : 10 à 40 cm
Fueio : coumpausado
Tipe bioulougico : Emicriptoufite
Cicle bioulougico : Planto renadivo

Gènre : Trifolium
Famiho : Fabaceae
Famiho classico : Leguminosae

Ordre : Fabales

Coulour de la flour : Roso
Petalo : irreguliero
Ø (o loungour) enflourejado : 1 à 1,6 cm
Flourido : Printèms - Estiéu

Sòu : Ca
Autour basso e auto : 0 à 1200 m
Aparado : Noun
Abriéu à avoust

Liò : Pelouso fresco - Trepadou
Estànci : Termoumediterran à Mountagnard
Couroulougi : Paleoutemperado
Ref. sc. : Trifolium fragiferum L., 1753

Cano

Arundo donax

Poaceae Graminaceae

Autre noum : Canié.

Noms en français : Canne de Provence, Roseau à quenouilles.

Descripcioun :
La cano que ié dison "de Prouvènço" es uno plano bèn couneigudo emé si grando e gròssi tijo lignouso d'enviroun 3,5 cm de diamètre, si long rizoumo espès e si fueio verdalo de 2 à 5 cm de larg.

Usanço :
La cano que nous vèn dóu cèntre de l'Asìo, fuguè proun plantado pèr proutegi li culturo dóu mistral. Nòstis àvi se n'en servien pèr gaubeja mant'uno besougno : pèr eisèmple pèr apara li det dóu tai dóu voulame (li dedau) o enca pèr acroucha lou calèu (la moco). Lou rizoumo èi manjadis (li fueio peréu, mai soun proun amaro) cue (rousti o bouli) o adouba en farino pièi mesclado à d'autro. Emai èro pas gaire emplegado coume planto vertuouso, aro d'ùni prouprieta soun estado troubado coume dins la dessensibilisacioun pèr l'alergìo.